Американскиот претседател Доналд Трамп изјави дека сè уште не донел конечна одлука во врска со можен напад врз иранските нуклеарни постројки. Во изјава дадена пред новинарите на тревникот пред Белата куќа, Трамп рече:
„Можеби ќе го направам тоа, можеби нема. Никој не знае што ќе направам.“
Според американски медиуми, претседателот веќе ги одобрил плановите за потенцијален напад, но засега одлучил да почека, надевајќи се дека Техеран би можел да се откаже од својата нуклеарна програма преку дипломатија.
Од иранската мисија во Обединетите нации реагираа јасно, нагласувајќи дека Техеран „не преговара под притисок“ – поракa што укажува дека Иран нема намера да попушти поради заканите од американска воена интервенција.
Поранешната советничка за национална безбедност на Трамп, К.Т. Мекфарланд, изјави дека претседателот ќе ја донесе конечната одлука „во последен момент“. Сепак, без јасен надворешен рок што би го принудил на акција, останува неизвесно кога би можело да се случи таа одлука.
