Најсмртоносен руски напад врз Киев годинава – најмалку 18 загинати
Русија вчера изврши еден од најтешките напади врз главниот град на Украина од почетокот на годината, уништувајќи дел од станбена зграда и предизвикувајќи смрт на најмалку 18 лица, додека 151 се повредени. Според украинските власти, во нападот биле користени стотици беспилотни летала и десетици проектили.
Киев прогласи ден на жалост поради жртвите, а претседателот Володимир Зеленски го нарече нападот „еден од најстрашните од почетокот на војната“. Според официјалните податоци, 16 лица загинале во Киев, а уште две во Одеса.
„Ова е чист тероризам. Светот, САД и Европа мора конечно да реагираат како што цивилизираниот свет реагира на терористи“, изјави Зеленски. Тој соопшти дека Русија лансирала 440 дронови и 32 проектили врз Украина.
„Прашање на живот и смрт“
На самитот на Г7 во Канада, Зеленски повторно апелираше за зајакнување на противвоздушната одбрана.
„Ова е прашање на живот и смрт. Мора да добиеме повеќе ПВО-системи и ракети, но и да почнеме со нивно локално производство во Украина“, нагласи тој.
Мисијата за човекови права на ОН го потврди нападот како најсмртоносен во Киев оваа година и предупреди на сериозната опасност од користење тешко вооружување во урбани средини.
„Синоќешниот напад покажува колку е опасна тактиката на комбинирање дронови и проектили во густо населени подрачја – таа води кон цивилни жртви и огромно страдање“, изјави шефицата на мисијата, Даниеле Бел.
Погодени 27 локации во Киев
Руското Министерство за одбрана соопшти дека целите на нападот биле „воено-индустриски објекти“ во Киевската и Запорошката област. Биле користени проектили од воздух, копно и море, како и беспилотни летала.
Украинските власти информираа дека се погодени најмалку 27 локации во Киев, меѓу кои станбени згради, училишта и клучна инфраструктура. Во Соломјанскиот округ, ракета целосно уништила дел од деветкатна зграда, претворајќи ја во урнатина.
