Замената на фосилните горива со обновливи извори на енергија не е веќе избор, туку неопходност, порача директорот на МЕПСО, Бурим Љатифи, на осмото издание на Македонскиот енергетски форум – МЕФ 2025. Тој подвлече дека зелената енергетска транзиција и инвестициите во енергетската инфраструктура се клучни за иднината на земјата, за нејзината енергетска независност, одржливост и конкурентност.
„Производството на обновлива енергија е по својата природа променливо и непредвидливо. За да управуваме со тие ефекти, системот мора да биде стабилен, флексибилен и поддржан со интензивни инвестиции,“ нагласи Љатифи.
Според него, досега МЕПСО има примено над 80 барања за поврзување на обновливи извори на електрична енергија на преносната мрежа, со вкупен капацитет од 9.000 MW. Сепак, на краток рок, електроенергетскиот систем може да интегрира до 1.500 MW нови капацитети, со дополнителна флексибилност преку 200 MW системски резерви.
„МЕПСО успешно управува со два паралелни и сложени процеси – обезбедување стабилност на електроенергетскиот систем и динамична интеграција на обновливите извори. Тоа бара висока координираност, техничка експертиза и визија,“ рече тој.
Форумот МЕФ 2025 ги собра на едно место претставниците на владините институции, енергетски експерти, индустриски лидери, граѓански организации и меѓународни партнери, со цел да се трасира одржлива и праведна енергетска иднина за Западен Балкан.
