Шест судии кои неодамна беа унапредени од Граѓанскиот во Апелацискиот суд од страна на Судскиот совет, можеби нема да седнат во повисоките судски фотелји. Причината е тужба поднесена од судијата Андреј Димовски до Управниот суд, со која бара поништување на решението за негово оценување.
Судијата Димовски тврди дека не бил праведно оценет, односно дека не му биле доделени поени за сите критериуми кои ги исполнувал. Повикувајќи се на пракси од Европскиот суд за човекови права, тој смета дека начинот на кој бил применет законот претставува прекршување на член 6 од Европската конвенција за човекови права.
„Начинот на непремена на прописите беше неисправен до тој степен што државата ги прекршила своите позитивни обврски“, рече судијата Димовски за „Алфа“.
Неговиот адвокат, Билјана Јандриоска, изјави дека и покрај претходната пресуда од Управниот и Врховниот суд во полза на Димовски, Судскиот совет не ги почитувал ниту забелешките, ниту процедурите, и продолжил со унапредувањето на шестмина други кандидати.
„Претходната пресуда содржеше низа забелешки кои воопшто не се отстранети. Тоа ќе се потврди преку доказната постапка“, истакна Јандриоска.
Од Судскиот совет, пак, со контрааргументи. Велат дека решението за оценување од декември 2023 година било донесено врз основа на важечкиот закон од 2019, и дека Врховниот суд не го укинал решението за оценувањето на судијата, туку поради приговор.
„Тужителот веќе водел правна постапка за истата правна работа пред Врховниот суд“, изјави претставник на Советот.
Ако Управниот суд ја уважи тужбата, Советот ќе мора да направи ново оценување и бодување на Димовски. Тоа би можело да ја поништи целата постапка за унапредување и да ги доведе во прашање местата на шестмината судии кои веќе беа избрани за Апелација – Елизабета Настов, Софија Миленкова, Цветанка Сиљаноска Костадиновска, Кети Германова, Благица Ѓошевска и Артан Лимани.
Целиот процес е веќе под лупа на јавноста и стручната фела, особено поради фактот што изборот се случи дури три години по распишувањето на огласот.
