Американскиот претседател Доналд Трамп изјави дека испраќањето на Националната гарда во Лос Анџелес било „одлична одлука“, нагласувајќи дека на тој начин бил спречен целосен колапс на градот поради немирите што избија викендов. Причината за протестите беше неговата заострена имиграциска политика, која веќе предизвика остри реакции на повеќе нивоа.
„Да не го сторевме тоа, Лос Анџелес ќе беше целосно уништен“, напиша Трамп на својата социјална мрежа Truth Social, упатувајќи жестоки критики до гувернерот на Калифорнија Гавин Њусом и градоначалничката на Лос Анџелес Карен Бас. Тие, според Трамп, лажно ја претставувале ситуацијата велејќи дека протестите биле мирни, иако, како што истакна, снимките од теренот сведочат за насилство, запалени возила и напади врз полицијата со молотови коктели.
Откако демонстрациите влегоа во трет ден, полицијата во неделата вечер прогласи дел од центарот на Лос Анџелес за забранета зона за собирање, барајќи од граѓаните да се разидат. Беа уапсени 10 лица, а претходниот ден 29, меѓу кои и претседателот на Меѓународниот синдикат на вработени во услужни дејности на Калифорнија, Дејвид Хуерта. Тој беше приведен од федерални агенти под сомнение дека им го попречувал пристапот до неговото работно место. При апсењето бил повреден, а синдикатот и политичките сојузници најавија правна реакција.
Во меѓувреме, демократите ја обвинија администрацијата на Трамп за прекумерна употреба на сила и насочена политика против имигрантите. Сенаторот Џесус Гарсија од Чикаго на собир за имигрантските права порача: „Не одиме никаде!“ – додавајќи дека се работи за намерна стратегија за заплашување и контрола.
Според најавите од Белата куќа, имиграциската и царинска служба (ICE) добила налог да приведува околу 3.000 лица дневно, со цел досега невидено ниво на депортации и затворање на американско-мексиканската граница.
