Трамп со остри критики кон Маск: „Ако ги поддржи демократите, ќе има последици“
Односите меѓу американскиот претседател Доналд Трамп и милијардерот Илон Маск дополнително се влошуваат, откако двајцата сè почесто си упатуваат меѓусебни критики и обвинувања во јавноста.
Според пишувањето на Вашингтон пост, повикувајќи се на извори блиски до поранешната администрација, Трамп во приватен разговор со свои соработници го нарекол Маск „сериозен зависник од дрога“.
„Тоа е човек со сериозен проблем — вистински зависник од наркотици“, изјавил Трамп, според наводите на американскиот весник.
Изјавите доаѓаат во период на зголемени тензии, откако Маск јавно се спротивстави на новиот предлог-закон за трошење и даноци, поддржан од републиканците. Според него, законот негативно влијае врз пазарот на електрични возила и е спротивен на интересите на индустријата што ја предводи.
Огнена реторика и обвинувања од двете страни
Маск, кој во минатото имаше коректни односи со Трамп, сега отворено го критикува, алудирајќи дури и на можни поврзаности на поранешниот претседател со познатиот сексуален престапник Џефри Епштајн. Во изјава објавена од неколку медиуми, Маск наводно тврдел дека „името на Трамп фигурира во документацијата поврзана со случајот Епштајн“, без притоа да наведе конкретни докази.
Од своја страна, Маск претходно има признаено дека користи кетамин — но, како што истакнал, тоа е по лекарска препорака. Сепак, според Њујорк тајмс, се појавиле тврдења дека користел поголеми дози од вообичаеното, што наводно довело до здравствени компликации, меѓу кои и проблеми со мочниот меур.
Крај на соработката и политички притисок
Поранешната блиска соработка меѓу двајцата — особено за време на владината иницијатива за подобрување на административната ефикасност — сега е само дел од минатото. Трамп наводно на блиски соработници им порачал:
„Не гледам никаква причина да го обновувам односот со Маск. Тоа за мене е затворено поглавје.“
Тензиите кулминираа со отворено предупредување од Трамп, кој наводно изјавил дека, доколку Маск одлучи финансиски да ги поддржи демократите на претстојните претседателски избори, тоа ќе има „сериозни последици“ за него лично и за неговите компании.
