Тајланд ја засили својата воена присутност долж спорната граница со Камбоџа, откако соседната земја го зголеми бројот на свои војници во истиот регион, соопшти тајландскиот министер за одбрана и заменик премиер Пхумтам Вечајачаи.
„Дојде до концентрација на воени сили, што ги зголеми тензиите“, изјави министерот по последната рунда неуспешни билатерални преговори во четвртокот. Тајландската армија обвини дека камбоџански војници и цивили повеќепати нелегално навлегле на нејзина територија, оценувајќи ги тие постапки како провокации со „јасна намера за употреба на сила“.
Во одговор, Тајланд најави дека ќе преземе контрола над сите гранични контролни точки и дека подготвува „операција на високо ниво“ за заштита на својот суверенитет. Иако не се прецизирани размерите на новите распоредувања, напнатоста на теренот расте.
Камбоџанскиот премиер Хун Манет, синот на долгогодишниот лидер Хун Сен, изјави дека земјата не бара конфликт, но ќе се брани ако биде нападната. „Наш приоритет е почитување на меѓународното право и заштита на националниот суверенитет“, рече тој.
И покрај напорите на малезискиот премиер и актуелен претседавач со ASEAN, како и на Кина, да се намалат тензиите, дипломатските обиди засега не даваат резултати. Камбоџа најави дека ќе ги предаде споровите околу четири делови од границата на Меѓународниот суд на правдата, но Тајланд одбива да ја признае надлежноста на судот и инсистира на билатерално решение.
Двете земји имаат долга историја на спорови околу 817 километри долгата граница, првпат мапирана во 1907 година од француската колонијална власт. Последната сериозна ескалација се случи во 2008 година околу античкиот хинду храм Преах Вихеа, кога дојде до вооружени конфликти и човечки жртви.
Иако сегашните влади имаат потопли односи благодарение на блиските врски меѓу семејствата на поранешните лидери, националистичкото расположение повторно се засилува – особено во Тајланд.
