Грчкото Министерство за здравство предложи нов закон според кој сите лица, без оглед на возраста, ќе мора да приложат лична карта или пасош при купување алкохолни пијалаци, цигари, вейпови и производи од канабис. Овој предлог-закон е ставен на јавна дискусија која ќе трае до 16 јуни 2025 година, објави грчкиот весник Екатимерини.
Со новата регулатива, целта е да се намали достапноста на штетни супстанции кај младите и да се зајакне контролата врз нивната продажба. Законската обврска ќе важи и за туристите, кои ќе мора да имаат оригинал документ – дигитални копии на телефон најчесто нема да бидат прифатени.
Предлог-законот предвидува строги казни за прекршителите, со глоби до 10.000 евра и можност за затворање на објектите кои не ја почитуваат регулативата. Дополнително, малолетниците ќе имаат целосна забрана за влез и работа во барови и клубови, освен при специјални приватни настани со строго утврдени правила.
Законскиот пакет вклучува и воспоставување дигитален регистар за сите продавачи и формирање на специјализирана единица во рамките на националната здравствена агенција, која ќе го следи движењето на овие производи.
Иако датумот на стапување на сила ќе зависи од текот на законодавниот процес и евентуалните измени во парламентот, доколку биде усвоен, Грција ќе стане една од ретките земји во светот што бараат идентификација за сите купувачи на алкохол и тутун – без оглед на возраста.
