За да се нахранат два милиони Палестинци дневно се потребни 600 камиони хуманитарна помош
Координаторот за владините активности на териториите (COGAT) при Министерството за одбрана на Израел соопшти дека вчера во Појасот Газа влегле 157 камиони со хуманитарна помош, носејќи брашно и прехранбени производи.
Дел од оваа помош бил пренасочен кон нови пунктови за дистрибуција со кои раководи Хуманитарната фондација на Газа – организација која ужива поддршка од Соединетите Американски Држави и Израел, пренесува Times of Israel.
Овие дистрибутивни центри денес се затворени, за да ѝ се овозможи на фондацијата логистички да се подготви за безбедно прифаќање на поголем број луѓе.
Според израелските власти, помошта што ја прими Газа преку граничниот премин Керем Шалом била претходно подложена на детална инспекција. Сепак, значителен дел од содржината на камионите што влегле во последните неколку недели сè уште чека да биде преземен од палестинската страна на преминот.
Обединетите нации посочуваат дека се потребни најмалку 600 камиони дневно за да се задоволат основните потреби за исхрана на околу два милиони жители на Газа.
Израел ја обнови испораката на хуманитарна помош на 19 мај, по прекин што траеше од 2 март, пренесува агенцијата Tanjug.
