Шумските пожари што го зафатија централниот дел на Канада во мај оставија последици и на другиот крај од Атлантикот. Според Службата за следење на атмосферата при програмата „Коперникус“ (CAMS), сателитските снимки потврдуваат дека чадот од пожарите во Манитоба и Саскачеван преминал преку Атлантикот и стигнал до Европа.
Првиот облак на голема надморска височина ја поминал медитеранската област на 18 и 19 мај, а веќе на 1 јуни нов, значително поголем облак чад навлегол над северозападна Европа. Очекувањата се дека уште чад ќе пристигне на континентот во следните денови.
Иако според CAMS нема сериозна закана по квалитетот на воздухот на ниско ниво, ефектите од чадот ќе бидат забележливи – магловито небо и поинтензивни црвени или портокалови залези.
„Пожарите се вообичаени за бореалните шуми од пролет до лето. Нашите податоци покажуваат дека централна Канада доживеа екстремно интензивни емисии од пожари, што се гледа и по тоа што чадот стигнува до Европа“, изјави д-р Марк Парингтон, виш научник во CAMS.
Службата продолжува да го следи развојот на ситуацијата и предупредува дека глобалните климатски ефекти се сè поочигледни и значајни.
