По 12.000 денари за обука на жени и на млади до 29 години – ова се деталите

Со Оперативниот план за вработување за 2025 година, Владата предвидува обуки за над 2.000 лица, со посебен фокус на жени и млади до 29 години. Обуките ќе траат до три месеци, а секој учесник ќе добива месечен надоместок од 12.000 денари.

Целта на мерката е зголемување на вработливоста преку стекнување практични и пазарно релевантни вештини.

Детали за обуките:

Обука кај работодавач:

На оваа обука ќе учествуваат 245 лица, сите невработени и евидентирани во Агенцијата за вработување. Обуката ќе се одвива на реално работно место, кај конкретен работодавач. Приоритет ќе имаат жените, младите и долгорочно невработените.

Обучување за побарувани занимања:

Опфаќа 600 лица и е насочена кон области како што се социјалните услуги, зелената економија, трговијата и услужниот сектор.

Обуки за основни и напредни вештини:

Вклучуваат 720 лица и се однесуваат на компјутерски и јазични обуки, како дел од стратешкиот пристап за дигитална писменост.

Напредни ИТ и дигитални обуки:

Овие обуки се реализираат преку лиценцирани програми и опфаќаат 470 учесници. На крајот од програмата, секој ќе добие меѓународно признат сертификат, што значително ја зголемува конкурентноста на пазарот на трудот.