Околу сто млади каратисти од Македонија веќе со часови се заглавени во Албанија, откако автобусот со кој се враќале од Балканското карате првенство во Црна Гора по вторпат се расипал на пат. Децата, на возраст од основно и средно училиште, биле дел од официјалната делегација организирана од Карате федерацијата на Република Северна Македонија, која на 30 мај ги однела на натпреварот.
Родителите, кои за ова патување платиле речиси 14.000 денари по дете, се револтирани и загрижени, бидејќи децата прво доживеале дефект на автобусот уште при поаѓањето — кога се извадило тркалото од возилото. По неколку часа чекање, стигнал заменски автобус кој ги однел до дестинацијата. Меѓутоа, проблемите не завршиле тука.
Престојот во хотелот, како што велат родителите, бил далеку под секое прифатливо ниво. „Условите биле срамни – нехигиенски простории, недоволно храна и безбедносни ризици,“ велат тие.
Најдраматичниот момент се случил на враќање, кога автобусот повторно се расипал, овој пат во Албанија, оставајќи ги децата на пат без информација кога ќе можат да тргнат дома. Дополнителна грижа претставува тоа што многу од нив останале без батерии на телефоните, со ограничен или никаков контакт со родителите.
Родителите гневно реагираат и прашуваат: „Како е можно државата да дозволи деца да патуваат со небезбедни автобуси? Кој е одговорен за нивната безбедност?“ Тие бараат одговорност од организаторите и надлежните институции, како и итна реакција за безбедно враќање на децата.
Фото: Илустрација
