Истражниот комитет на Руската Федерација денеска официјално ги оквалификува серијата експлозии на железничките пруги во регионите Брјанск и Курск како терористички напади.
Портпаролот на Кремљ, Дмитриј Песков, изјави дека рускиот претседател Владимир Путин бил информиран за инцидентите од страна на Федералната служба за безбедност (ФСБ) и Министерството за вонредни ситуации, пренесе РИА Новости.
Според Песков, претседателот Путин телефонски разговарал со гувернерот на Брјанската област, Александар Богомаз, како и со директорот на Руските железници, Олег Белозјоров, од кои лично ги слушнал извештаите за преземените мерки и тековната истрага.
Во фокусот на вниманието е трагичниот инцидент што се случи во саботата вечерта, кога патнички воз на релација Климов–Москва, во кој се превезувале 388 патници, излетал од шините поради уништување на железнички мост. Според официјалните податоци, седум лица загинале, а најмалку 66 се повредени.
Руските железници соопштија дека причината за несреќата е „нелегално нарушување на транспортните операции“, а конструкцијата на мостот се урнала како последица на предизвикана штета.
Рускиот сенатор Андреј Клишас изјави дека инцидентот претставува „украински терористички напад“, алудирајќи на саботажа со цел дестабилизација на транспортната инфраструктура.
Надлежните служби продолжуваат со истрагата, а властите најавија зголемени безбедносни мерки на клучните железнички рути низ западна Русија.
