Жена од Јужноафриканската Република е осудена на доживотен затвор поради тоа што ја продала својата шестгодишна ќерка, која исчезна минатата година и сè уште не е пронајдена.
Кели Смит, заедно со својот партнер Жакен Аполис и нивниот пријател Стивен ван Рин, доби доживотна казна за трговија со луѓе и дополнителни 10 години затвор за киднапирање.
Малата Џошлин исчезна во февруари 2024 година, а потрагата по неа мобилизираше стотици граѓани ширум земјата. Нејзината фотографија беше редовно прикажувана на телевизиите и социјалните мрежи, но без успех – девојчето не е пронајдено до денес.
Судењето заврши со изрекување на пресудите во спортскиот центар во градот Салданха Беј, околу 120 километри северно од Кејптаун. Ваквиот избор на локација беше направен за да се овозможи присуство на локалното население, кое внимателно го следеше случајот.
Во исказот на судот, Смит изјавила дека на денот на исчезнувањето ќерката ја оставила со Аполис. Сепак, сведок во постапката посведочил дека таа, заедно со двајцата мажи, ја продала девојчето на локален исцелител за околу 1.000 американски долари. Според сведочењето, исцелителот го побарал детето заради органи.
Иако пресудата не открива јасни детали за тоа што точно се случило со девојчето и кому било предадено, судот заклучи дека детето било продадено во ропство — тежок и шокантен злостор.
Случајот ја потресе јавноста во Јужна Африка и повторно го отвори прашањето за трговијата со деца и недоволната заштита на најмладите.
