Градоначалникот на Општина Чаир, Висар Ганиу на денешната прес-конференција посочи дека Чаир не е ни меѓу петте општини со најмногу дивоградби во Скопје, но оваа акција што ја презема градоначалничката на Скопје, Данела Арсовска е од политички побуди и ја замоли Данела Арсовска да не биде, како што вели, инструмент на моќниците на ДУИ.
-Госпоѓо Арсовска, почитувам дека сте жена, но ве молам, решавајте ги проблемите смирено и достоинствено, немојте да бидете инструмент на рацете на неколку моќници од ДУИ. Ве повикувам да се вразумите и да не бидете инструмент во политичките игри на ДУИ. Чаир не е шаховска фигура, тој е живо ткиво на Скопје- рече градоначалникот.
Ганиу рече дека на суд ќе се докажува кој објект е дивоградба, но смета дека не е во ред само Општина Чаир да биде на „пик“ на Град Скопје.
Тој ја повика градоначалничката да го исчисти ѓубрето од Чаир што е во нејзина надлежност.
-Чаир е домаќин на над 60.000 луѓе, деца, возрасни, семејства, што очекуваат основни, а не луксузни услови за живот. За жал, последните недели, тие услови се доведени во прашање. ниту еден од суштинските работи кои се во надлежност на Градот Скопје, а се однесуваат на граѓаните на Општина чаир не се извршуваат .Ве охрабрувам веднаш да ги ангажирате сите расположливи капацитети на ЈП „Комунална хигиена“ и да го исчистите наталожениот отпад. на ова влажно и топло време, секој ден доцнење ја зголемува опасноста од зарази меѓу децата и граѓаните- апелираше градоначалникот.
Тој тврди и дека општината воопшто нема неплатени долгови кон Градот, а доколку тие навистина постојат, Ганиу „ја охрабри“ Арсовска да поднесе пријава по која потоа на суд ќе се утврди вистината.
