Денес на вториот ден од програмата на Балканскиот Алумни Самит, директорот Гоце Димовски како главен говорник се обрати на тема „Градење на финансиски екосистем за младинско претприемништво и иновации: Овозможување на раст на регионалните пазари“. Димовски ги нагласи заложбите на Дирекцијата за ТИРЗ која во соработка со Владата и сите засегнати страни напорно работи за подобрување на националната економија каде сите ќе имаат еднакви можности за раст и развој, а младите ќе ја гледаат својата иднина тука, во својата татковина, на Балканот.
„Во преговори сме со повеќе мултинационални компании, а веќе поставивме камен темелник на 3 нови фабрики кои ќе отворат над 2000 работни места во наредните неколку години. Овие инвестиции ќе донесат нови можности за развој на младите, што ќе им овозможи да бидат дел од глобални корпорации, а сепак да бидат тука, дома. Овие инвестиции ќе донесат нови технологии и иновации, отворајќи свои центри за истражување и развој каде младите ќе имаат шанса да се стекнат со стратешки искуства тука, во Македонија.“
Директорот Димовски потенцираше дека Македонија и Балканот не смее да бидат место на одлив на мозоци, туку место каде младината ќе има можности за развој, за што е потребна безусловна и транспарентна регионална соработка која ќе се фокусира на долгорочниот развој на целиот Балкан.
„Наша задача, како институција, заедно со владата е да креираме средина каде приватниот сектор ќе го препознае и вреднува потенцијалот на младите, а младите ќе гледаат сигурна иднина во овој регион.“
Самитот во организација на Macedonian American Alumni Association – MAAA со поддршка од Амбасадата на САД ги собра на едно место поранешните студенти на програмите за размена финансирани од владата на САД од седум земји: Македонија, Албанија, Србија, Косово, Босна и Херцеговина, Црна Гора и Бугарија.
