Невиден инцидент го потресе европскиот ракомет! Финалето на ЕХФ Европскиот Куп меѓу македонскиот Алкалоид и грчкиот АЕК стана вистинска драма уште пред да започне – затоа што… не започна! Тимот од Атина одби да излезе на терен во СЦ „Борис Трајковски“, оставајќи го натпреварот неодигран и навивачите во шок.
Европската ракометна федерација (ЕХФ) реагираше експресно – целата документација е предадена на правните тела, со барање за иницирање на постапка против двата клуба. Причините? Од ЕХФ велат дека се истражува распределбата на билети за гостинските навивачи од страна на Алкалоид, но и одбивањето на АЕК да се појави на теренот.
И двата клуба се повикани да поднесат свои изјави, по што правните тела ќе ја донесат конечната одлука. До тогаш, ЕХФ најави дека нема да дава дополнителни информации. Ракометниот свет е во неизвесност – дали ќе следува жестока казна за Алкалоид и АЕК?
