Анчелоти: Нејмар останува клучен, но не е во форма за повик
Селекторот на бразилската фудбалска репрезентација, Карло Анчелоти, појасни зошто Нејмар не се најде на списокот за претстојните квалификациски натпревари за Светското првенство во 2026 година против Еквадор и Парагвај.
– Се обидов да изберам играчи кои моментално се во добра физичка форма. Нејмар неодамна се врати од повреда и не е целосно подготвен. Тој останува исклучително важен за нашиот тим и секогаш ќе биде во нашите планови, изјави Анчелоти за шпанската „Марка“.
Италијанскиот стратег додаде дека има голем број повредени фудбалери кои не можеа да бидат повикани, меѓу кои и Нејмар.
– Разговарав директно со него и му ја објаснив одлуката. Покажа целосно разбирање. Нејмар се врати во Бразил со цел да се подготви најдобро што може за Мундијалот. Репрезентацијата смета на него, нагласи Анчелоти.
Карло Анчелоти беше официјално промовиран за селектор на Бразил на 26 мај. Со искуство и реноме стекнати на клупски план, 65-годишниот Италијанец сега ја има задачата да ги предводи „Кариоките“ кон успех на Светското првенство во 2026 година.
