На помошниот терен на Градскиот стадион во Штип од 4 до 6 јули, под отворено небо ќе се реализира Д Фестивал. Фестивалот за првпат се организира во Штип, а годинава е со хуманитарен карактер, односно преку Супорт Кочани сите средства ќе бидат наменети за настраданите од пожарот во дисктеката Пулс. Катерина Евго од „Пасворд продукција“ вели дека влезот за сите ќе биде бесплатен, со можност да се донира преку купување он лајн карти по цена од 1.500 денари.
-Годинава Д Фестивал ќе се одржува како хуманитарен фестивал и целосно ќе биде посветен на инцијативата Супорт Кочани. Влезот за посетителите годинава за сите ќе биде бесплатен, но ќе постои таканаречен хуманитарен билет кој од денеска ќе биде достапен за сите, а средствата ќе бидат на Супорт Кочани, изјави Евго.
На овогодинешното издание на Д Фестивал ќе се претстават над 30 изведувачи од земјава и странство. Ќе има поставено две сцени на помошниот терен на Градскиот стадион во Штип и се очекува голем број посетители од државата и странство.
Општина Штип е со обврска да обезбеди електрична енергија, вода и локација за самиот фестивал. Сите сместувачки капацитети ќе бидат ставени на располагање на гостите од страна, бидејќи оваа година нема да има кампинг зона.
-Д Фестивал ќе додаде вредност преку богатата културно – забавна програма. Штип е град кој има богата забавно кулчтурна програма во текот на целата година, а Д фестивал го започнуваме како новитет од оваа година и сум сигурен дека ќе го привлече вниманието на илјадници гости од страна, рече градоначалникот на Општина Штип, Иван Јорданов.
Д Фестивал првпат се одржал на 1 август 2011 година во Дојран, со 12 артисти и 950 посетители, тогаш без волонтери и организации. Во 2024 година на Д Фестивал учествуваа 320 музичари на шест сцени од 17 земји. Дел од фестивалот беа 120 организации и исто толку волонтери. Ова е единствен фестивал од ваков тип во државата и тенденција е годинава да се надминат сите поставени рекорди.
На денешната прес-конференција беше презентирана и музичката програма на Д Фестивал 2025 која ќе се одвива на двете најголеми бини на овој фестивал, Главната бина и „Москито Стејџ“ каде што во трите вечери, од 4 до 6 јули ќе настапат повеќе од 30 музички изведувачи.
Најголем дел од програмата го сочинуваат домашните артисти, а во таа листа ќе се запишат дел од најрелевантните претставници на современата македонска музичка сцена, уметници кои со своето дело веќе оставија неизбришлива трага, но и сѐ уште ја восхитуваат музичката јавност со своето творештво и сценски изведби: АРХАНГЕЛ, КИРИЛ ЏАЈКОВСКИ кој ќе настапи заедно со TK WONDER и ROOTSMAN I, МИЗАР, ФОЛТИН, ЉУБОЈНА, ПИЈАН СЛАВЕЈ, ПАРКЕТИ.
Покрај нив, ќе настапат и водечките претставници на новата македонска музика: ДИНА ЈАШАРИ, PEACH VICE, DOPE KUKJATA, Последен удар, Princess Donatsu, Don Playa, ZEE & Matej Foltz, Кем, Moira, Nikartic, Gwass, диџеите Флудер и Мана.
Од светските ѕвезди, на Д Фестивал доаѓаат британските дарк-рок пионери THE SISTERS OF MERCY! Ова е култно име на глобалната дарквејв сцена и бенд кој повеќе од четири децении го восхитува светот со својот препознатлив звук и интензивни сценски настапи. Од Јамајка во Штип ни пристигнуваат и вистинските легенди INNER CIRCLE! Со хитови како “Bad Boys”, “Sweat (A La La La La Long)” и многу други, ова е несомнено еден од најголемите реге бендови на сите времиња.
Фановите на најжестокиот звук пак, ќе имаат чест да уживаат во настапот на култниот бразилско-американски метал бенд SOULFLY, предводен од славниот Макс Кавалера. Најзаразниот рефрен од актуелниот избор за песна на „Евровизија“ пристигнува на Д Фестивал со третопласираниот артист од финалето, TOMMY CASH, рап изведувачот, танчер и визуелен уметник од Естонија.
На Д Фестивал годинава нема да изостанат ниту ѕвездите од регионот, па македонската публика ќе има прилика да ги погледне секогаш импресивните и извонредни БУЧ КЕСИДИ – убедливо највозбудливиот бенд на новата балканска поп-рок сцена и С.А.Р.С. – докажано еден од најомилените бендови на овие простори.
Организаторите велат дека кон оваа листа на изведувачи наскоро ќе бидат додадени и нови имиња, а публиката на Д Фестивал ќе има привилегија да биде дел од тридневниот музички маратон.
