Почина познат бодибилдер – го уби оваа опасна супстанца која ја земаше

Светот на бодибилдингот е во шок откако рускиот шампион и поранешен рекордер во „пауерлифтинг“, Никита Ткачук , почина на 35-годишна возраст поради тешки здравствени компликации предизвикани од употребата на синтол – супстанца што се користи за вештачко зголемување на мускулната маса.

На млада возраст, Ткачук стекна голема популарност во фитнес и бодибилдинг заедницата благодарение на неговите импресивни спортски резултати. 

Неговата сила и физика му донесоа спонзорски договори, вклучувајќи и еден со фармацевтска компанија која го обврза на употреба и промоција на синтол.

Сепак, оваа одлука се покажа како фатална. Синтолот, кој се инјектира директно во мускулите за да се зголеми нивниот волумен, предизвикал неприроден оток на мускулите и голем број сериозни здравствени проблеми. 

Со текот на времето, му беше дијагностицирана бубрежна и белодробна инсуфициенција, автоимуна болест, таложење на калциум во ткивата и, финално, фатален срцев удар.

Ткачук беше подложен на неколку операции и се обиде да се врати на тренинзите, но неговата здравствена состојба дополнително се влоши откако се зарази со Ковид-19. 

Во емотивно видео, снимено две години пред неговата смрт, тој отворено зборуваше за последиците од своите избори, нагласувајќи дека длабоко жали што користел синтол и апелирајќи до младите луѓе да не ја прават истата грешка.

„Ова беше мојата најголема грешка“, рече тој во документарецот наречен „СИНТОЛ – Мојата најголема грешка“, кој стана вирален меѓу љубителите на бодибилдингот и јавноста ширум светот.

Бодибилдинг заедницата се збогува со Никита со бројни пораки на сочувство и сеќавања на неговиот спортски дух, сила и искреност. 

Неговиот трагичен крај служи како предупредување за опасностите од нерегулирана употреба на супстанции за естетски изглед и притисокот од спонзорствата во светот на спортот.