Во рамки на широка полициска операција насочена кон разоткривање и неутрализирање на педофилска мрежа што оперирала преку апликацијата Telegram, француските власти привеле 55 мажи од понеделник до четврток наутро, соопшти Канцеларијата за заштита на малолетници (OFMIN).
Приведените се на возраст од 25 до 75 години и доаѓаат од различни социјални профили – меѓу нив има свештеник, дедо, болничар, наставник по музика, татковци на семејства, но и неженети мажи. Сите тие, според истражителите, разменувале експлицитни и кривични содржини преку шифрирани пораки на Telegram и биле во контакт со „екстремно опасни“ лица кои веќе се наоѓаат во притвор од летото 2023 година.
Операција со широк обем
Апсењата се извршени во 42 оддели низ Франција, а осомничените се теретат за поседување, дистрибуција и гледање педофилско-порнографски материјали што вклучуваат деца под десетгодишна возраст. Поради нецентрализираниот карактер на случајот, во истрагата се вклучени 42 локални обвинителства.
Оваа сеопфатна акција следи по летното апсење на неколку познати педофили, кои сексуално злоупотребувале деца и нивните злосторства ги документирале и споделувале на Telegram.
Telegram – „омилена алатка“ на педофилите
Квентин Беван, шеф на одделот за оперативни активности во OFMIN, изјави дека истражниот тим интензивно работел десет месеци, анализирајќи илјадници пораки, фотографии и видеоматеријали поврзани со сексуално злоставување деца.
„Telegram и натаму останува привилегирана платформа за педофили“, изјави Беван, додавајќи дека, иако по апсењето на основачот на Telegram, Павел Дуров, минатото лето е постигнат напредок во соработката, платформата и понатаму „едвај го исполнува законскиот минимум“ во справувањето со овие кривични дела.
Француските власти најавуваат продолжување на истрагата и засилени напори за сузбивање на онлајн сексуалната експлоатација на деца, а јавноста е повикана да биде внимателна и да пријавува секое сомнително однесување.
