Франција ќе гради затвор со највисоко ниво на безбедност во срцето на Амазонија
Франција планира изградба на затвор со највисоки безбедносни стандарди во Француска Гвајана, со цел пресметка со организираниот наркокриминал. Проектот, вреден 400 милиони евра, беше најавен од министерот за правда Жералд Дарманен за време на неговата официјална посета на оваа прекуморска територија на Франција, која се граничи со Бразил и Суринам.
Новото затворско одделение ќе се наоѓа во Сен Лоран ди Марони и ќе има капацитет за 500 лица, од кои 60 ќе бидат високопрофилни дилери на дрога, а 15 осудени терористи. Освен затворскиот комплекс, на истата локација ќе се изгради и нов судски објект, со предвидено отворање најрано до 2028 година.
Локацијата е симболично значајна – во близина на озлогласениот „Ѓаволски остров“, поранешна француска казнена колонија, позната преку романот и филмот „Пеперутка“ со Дастин Хофман и Стив Меквин.
„Целта е да ги отсечеме најопасните наркодилери од нивните мрежи и да спречиме натамошна криминална активност“, изјави Дарманен, потенцирајќи дека затворот ќе придонесе и за ублажување на хроничната пренатрупаност во постојните казнени установи.
Министерот го постави справувањето со наркокриминалот како еден од приоритетите во својот мандат, најавувајќи и дека 100 од најмоќните наркофигури во земјата ќе бидат изолирани и префрлени во строго обезбедени установи на територијата на Франција.
„Неприфатливо е затворите да не претставуваат пречка. Некои дилери и натаму раководат со своите мрежи, нарачуваат убиства и вршат притисок врз судии, новинари, адвокати и затворски службеници“, порача Дарманен.
Со овој потег, француските власти испраќаат јасна порака дека борбата против наркокартелите се води со одлучност и конкретни чекори, дури и во најоддалечените делови од земјата.
