Украинскиот претседател Володимир Зеленски изјави дека е отворен за понатамошни преговори со Москва, но повтори дека украинските војници нема да се повлечат од териториите кои Русија ги анектираше.
– Ако Русија постави услов нашите војници да се повлечат од нашата земја, тоа значи дека не сакаат примирје ниту крај на војната“, рече Зеленски вчера, откако американскиот претседател Доналд Трамп телефонски разговараше со рускиот колега Владимир Путин.
– Москва тоа го разбира, рече Зеленски, нагласувајќи ја улогата на украинската војска во заштитата на својата територија.
Русија во повеќе наврати порача дека нејзино барање во мировните преговори е силите на Киев да се повлечат од четирите украински области, Доњецк, Луганск, Запорожје и Херсон, над кои Русија нема целосна контрола.
Зеленски потврди дека Трамп го контактирал еднаш пред разговорот со Путин и еднаш, заедно со европските лидери, по разговорот со рускиот претседател.
По телефонскиот разговор со Путин, Трамп рече дека преговорите меѓу Русија и Украина ќе почнат „веднаш“.
Украинскиот лидер ја изрази својата отвореност кон понатамошни преговори на високо ниво со Русија, САД и европските земји и додаде дека тие состаноци би можеле да се одржат во Турција, Ватикан или Швајцарија.
Зеленски рече дека сега очекува детали за меморандумот што го спомена Путин по разговорот.
Путин во соопштение за медиумите по разговорот рече дека меморандумот ќе ја утврди временската рамка и принципите за мирно решавање на конфликтот, вклучително и можен прекин на огнот.
