Плажата Праса, сместена на малиот грчки остров Кимолос во Егејското Море, е прогласена за плажа со најчиста морска вода во светот, објавија грчките медиуми, повикувајќи се на истражување спроведено од американската туристичка агенција Florida Panhandle.
Истражувањето било засновано врз анализа на 2,4 милиони туристички рецензии, при што Праса се издвојува како апсолутен победник. Според истата анализа, најголем број од највисоко оценетите плажи по квалитетот на водата се наоѓаат токму во Грција, што повторно ја потврдува репутацијата на земјата како вистински бисер на Медитеранот.
Плажата се наоѓа на североисточниот брег на островот Кимолос, кој брои помалку од илјада жители. Со своите кристално бистри води, спокојна атмосфера и автентична островска убавина, Праса станува сè попопуларна дестинација за оние кои бараат мир и бегство од масовниот туризам.
Во последните неколку години, Грција бележи постојан пораст на бројот на туристи. Само во 2023 година, земјата ја посетиле над 36 милиони лица, што претставува пораст од 20,8% во однос на претходната година. Иако најмногу посетители престојувале во регионот на Атика, токму Јужните Егејски Острови, каде што се наоѓа и Кимолос, забележале најголема туристичка потрошувачка и највисок број резервации.
Овие податоци уште еднаш го потврдуваат значењето на грчките острови како едни од најпосакуваните дестинации за одмор, благодарение на нивната природна убавина, кристалните води и уникатната клима. Со признанието за најчиста морска вода во светот, плажата Праса заслужено го добива вниманието како една од најубавите и најскриени тајни на Грција.
