Златото со најголем пад во последните шест месеци: Пад од 4% поради пазарниот оптимизам
Цената на златото минатата недела забележа најстрмоглав пад во изминатите шест месеци, намалувајќи се за речиси четири проценти – што претставува најголема неделна корекција од ноември наваму. Една унца (31,1 грам) злато сега се тргува речиси 10% под рекордното ниво од април, кога накратко ја надмина границата од 3.500 американски долари.
Повеќе фактори придонесоа за ваквиот пад на цената на овој благороден метал. Како клучни се наведуваат:
Намалување на глобалните геополитички тензии, особено поради постигнувањето на трговско примирје меѓу САД и Кина;
Зајакнување на американскиот долар, што традиционално ја намалува привлечноста на златото како заштита од девалвација;
Пораст на ризичната склоност кај инвеститорите, поттикнати од позитивни сигнали за економско закрепнување и ублажување на трговските бариери;
Профитирање по долг период на раст, бидејќи многу инвеститори решија да инкасираат добивки по 22% раст на цената на златото од почетокот на годината.
Во ваков амбиент, интересот за традиционалните „безбедни засолништа“ како што е златото, природно се намалува.
И покрај моменталниот пад, златото и понатаму останува клучен инструмент за хеџирање при економска или политичка неизвесност, но движењата на светските пазари јасно укажуваат дека во моментов преовладува оптимизам и склоност кон поризични инвестиции.
