Плачењето не е слабост – туку природен лек за емоционалната болка
Иако во општеството често се гледа како знак на слабост, науката сѐ појасно укажува дека плачењето има значајна улога во зачувување на менталното здравје. Наместо да ги задржуваме солзите, истражувањата покажуваат дека емоционалното плачење носи бројни психолошки придобивки: го олеснува емоционалниот товар, го намалува стресот и ја зајакнува емоционалната отпорност.
Само човекот плаче од емоции
Иако некои животни испуштаат солзи, тие имаат исклучиво физиолошка функција – да ги навлажнат и заштитат очите. Кај човекот, солзите често се поврзани со длабоки емоционални искуства. Научниците сѐ уште истражуваат зошто само човекот плаче од емоции и дали тоа е еволутивна грешка или, пак, важен психолошки механизам.
Најновите сознанија укажуваат дека солзите не се само физичка реакција – тие играат клучна улога во регулирање на нашето внатрешно емоционално рамновесие.
Плачењето го намалува стресот
Солзите содржат кортизол – хормон на стресот – кој со самото плачење се излачува од телото. Дополнително, чинот на плачење ја намалува неговата продукција, што доведува до чувство на олеснување и психички мир.
Хормони на среќа
Плачењето го поттикнува лачењето на хормоните окситоцин и ендорфини. Окситоцинот создава чувство на смиреност и блискост, додека ендорфините ја намалуваат анксиозноста и ја зголемуваат самодовербата. Тоа е причината зошто многумина по плачењето чувствуваат внатрешна рамнотежа.
Олеснување на психичката и физичката болка
Интензивното емоционално плачење може да активира лачење на природни опиоиди во телото, кои не само што ја ублажуваат психичката болка, туку делуваат и како аналгетик на физичко ниво. Овој процес е особено важен при доживување силни емоции, како тага или загуба.
Солзите се јазик без зборови
Плачењето е често повик за емпатија и разбирање. Кога не можеме да ги изразиме нашите чувства со зборови, солзите служат како сигнал дека ни е потребна поддршка. Како друштвени суштества, ние сме еволутивно предодредени да реагираме на емоциите на другите – а плачењето токму тоа го поттикнува.
„Ладење“ на мозокот
Интензивното плачење го поттикнува подлабокото дишење, со што се зголемува внесот на кислород и се подобрува циркулацијата. Ова придонесува за природно намалување на температурата на мозокот и создава чувство на телесно и емоционално олеснување.
Плачењето не е знак на слабост, туку природна реакција што ни помага да преживееме и да се излекуваме. Наместо да ги потиснуваме емоциите, вреди да се прифати плачењето како дел од нашиот емоционален процес – моќен чекор кон психичко здравје и рамнотежа.
