Руски борбен авион го наруши воздушниот простор на НАТО, Естонија го нарече инцидентот сериозен
Премиерот на Естонија, Кристен Михал, денеска соопшти дека руски борбен авион накратко навлегол во воздушниот простор на НАТО, при што инцидентот траел околу една минута.
Михал ја оцени ситуацијата како „многу сериозна“, нагласувајќи дека рускиот авион бил испратен додека естонските власти се обидувале да задржат танкер за кој постоеле сомнежи дека е дел од т.н. „флота во сенка“ – мрежа од бродови што Западот ја обвинува дека ѝ помага на Русија да ги избегне меѓународните санкции, пренесува Ројтерс.
Естонската морнарица претходно денес информираше дека се обидела да го запре танкерот „Јагуар“, кој пловел кон Русија, без да носи знаме. Бродот се наоѓа на листата санкционирани пловила од страна на Обединетото Кралство од минатата седмица. Наместо да се качат на бродот, естонските власти одлучиле да го придружат до руските територијални води.
„Јагуар“ е еден од околу 100 танкери кои Западот ги идентификува како дел од руската „сенка флота“, термин што се користи за бродови кои ѝ овозможуваат на Москва да тргува со нафта надвор од регуларните канали и во спротивност со меѓународните санкции.
Естонските патролни сили го следеле „Јагуар“ сè додека не ја напуштил нивната територија и не пристигнал во близина на руската пристанишна област Приморск. Според податоците за морскиот сообраќај, бродот бил впишан како закотвен под знамето на Габон – централноафриканска држава, иако пловел без јасна идентификација.
