Киев – Украинскиот претседател Володимир Зеленски денеска изјави дека ќе направи сè што е во негова моќ за да се одржи најавената средба со рускиот претседател Владимир Путин.
„Доколку Путин не е подготвен да дојде во Анкара, и Ердоган и јас сме подготвени да патуваме во Истанбул. Ќе направиме сè за да се одржи оваа средба“, изјави Зеленски, додавајќи дека никој освен него не може да преговара со Путин. „Тоа се мои обврски“, нагласи тој.
Зеленски истакна дека ако не дојде до средба со Путин, не треба да се очекуваат резултати, тврдејќи дека „ситуацијата веќе отишла предалеку“. Тој понатаму додаде дека Путин се плаши од директни преговори со него и дека ако рускиот лидер продолжи да ги избегнува разговорите, тоа ќе биде последен доказ дека тој не сака да ја запре војната.
Претседателот на Украина исто така изрази очекување дека доколку преговорите не успеат, САД и Европската Унија ќе воведат „строги санкции“ против Русија, бидејќи тоа би покажало дека Русија не е подготвена за дипломатија.
Преговори во Истанбул
Директните преговори помеѓу Зеленски и Путин треба да се одржат во четврток во Истанбул, а постои можност за учество и на американскиот претседател Доналд Трамп. Оваа средба претставува најнов обид на меѓународната заедница да посредува во завршување на војната која трае повеќе од три години.
Зеленски ја потврди својата присутност во Турција и го покани Путин да се приклучи на разговорите, нагласувајќи дека е подготвен да направи сè што е потребно за да се одржи состанокот. Путин, пак, предложи преговори без предуслови, но сè уште не го потврдил своето учество. Кремљ ги отфрли барањата на Западот за 30-дневен прекин на огнот како „ултиматуми“ и сè уште не е јасно дали Путин лично ќе присуствува.
Исто така, не е сигурно дали американскиот претседател Трамп, кој моментално е на турнеја по Блискиот Исток и изрази подготвеност да учествува во разговорите во Истанбул, ќе се приклучи доколку смета дека тоа ќе биде од корист. Зеленски го поздрави евентуалното присуство на Трамп, нагласувајќи дека тоа би можело да помогне во постигнувањето на мирот во Украина.
