Жената која исчезна пред 62 години пронајдена жива – Одри Бакеберг конечно лоцирана
Одри Бакеберг, која исчезна во 1962 година на 20-годишна возраст, пронајдена е жива и во добра здравствена состојба, соопштија американските власти, а пренесе Sky News.
Бакеберг го напуштила својот дом во Ридсбург, сојузната држава Висконсин, во јули истата година. Иако полицијата со години истражувала различни траги, случајот на крајот бил заборавен. Но, годинава случајот повторно бил отворен во рамки на анализа на нерешени исчезнувања, што довело до неочекуван пресврт.
Повторно отворање на случајот по шест децении
Како што соопшти канцеларијата на шерифот од округот Сок, еден детектив повторно ги прегледал сите досегашни докази и сведоштва. Благодарение на детална анализа и истражување, особено преку генеалошки платформи, детективот Исаак Хенсон успеал да ја пронајде Бакеберг, која денес има 82 години и живее надвор од државата Висконсин.
„Клучниот момент беше профилот на нејзината сестра на Ancestry.com. Тој ми овозможи пристап до податоци како посмртници, попис на население и други важни информации“, изјави Хенсон за локалната станица WISN. „Откако контактирав со локалната канцеларија на шерифот, десет минути подоцна таа ме повика. Разговаравме 45 минути.“
Причини за исчезнувањето
Според податоците на организацијата Wisconsin Missing Persons Advocacy, Одри Бакеберг била мажена и мајка на две деца кога исчезнала на 7 јули 1962 година. Тој ден излегла од дома за да ја подигне својата плата, но никогаш не се вратила. Нејзиниот сопруг тогаш контактирал со роднини, обидувајќи се да дознае каде се наоѓа.
Набргу по исчезнувањето, 14-годишната дадилка тврдела дека заедно со Одри стопирале до главниот град Медисон, од каде со автобус отпатувале во Индијанаполис. Тинејџерката изјавила дека се исплашила и решила да се врати дома, додека Одри одбила да ја следи и била последен пат видена кај автобуска станица.
Истата организација наведува дека нејзиниот брак бил исполнет со конфликти, а неколку дена пред исчезнувањето била поднесена и кривична пријава поради наводно семејно насилство. Иако семејството инсистирало дека никогаш не би ги напуштила своите деца доброволно, сопругот успешно поминал полиграфски тест и не бил поврзан со исчезнувањето.
„Живее поинаку и не се кае“
Детективот Хенсон изјави дека нејзиното заминување најверојатно било мотивирано од тежок семеен живот.
„Мислам дека едноставно одлучила да се повлече и да започне нов живот. Звучеше среќна и уверена во својата одлука – без никакво каење“, рече Хенсон.
Канцеларијата на шерифот потврди дека Одри самостојно ја донела одлуката да го напушти животот во Висконсин и дека во случајот не станува збор за кривично дело или насилство.
