Според нови разузнавачки информации што ги споделија американски и западни претставници, рускиот претседател Владимир Путин сега го насочил својот фокус во војната против Украина кон краткорочни цели. Главната цел, како што стои во извештаите, е да ја консолидира контролата врз територијата која руските сили веќе ја имаат под своја власт и да ја зајакне руската економија, која е сериозно погодена.
Овој нов пристап претставува пресврт во однос на претходните анализи од западните служби, според кои Путин верувал дека има доволно предност и ресурси за долготрајна војна, со амбиција да ја освои цела Украина.
Интересно е што оваа промена во ставот на Кремљ се поклопува со проценките на американскиот претседател Доналд Трамп и неговите соработници. Според нив, Путин денес можеби е повеќе подготвен да размислува за мировен договор отколку во минатото.
Сепак, скепцата останува. Иако актуелниот предлог за мир од страна на САД, наводно, оди во голема мера во корист на Русија – дури и со признавање на дел од териториите што ги зазеде – високи американски претставници се уште се сомневаат во искреноста на Путин. Стравот е дека дури и ако се постигне договор, Москва би можела подоцна да се обиде повторно да ја обнови војната и да заземе уште повеќе украинска територија.
Како што изјавил еден висок западен разузнавач, Путин денес не размислува „поскромно“, туку „пореално“ – со фокус на поблиски и достижни цели.
Притисокот што доаѓа од администрацијата на Трамп, која се заканува со нови санкции, како и тешката состојба на руската економија, дополнително го ограничуваат маневарскиот простор на Путин. Истовремено, Вашингтон испраќа сигнал дека по завршување на војната би можело да има големи американско-руски инвестиции – нешто што САД го нарекуваат „историска можност“.
Како што вели еден западен функционер: „Сè зависи од тоа што ќе биде ставено на маса – САД треба не само да прикажат победа дома, туку и да му понудат на Путин нешто доволно значајно за да паузира, а можеби еден ден повторно да ја започне војната“.
Истото лице посочува дека Путин често се повикува на регионите кои ги смета за „изворни земји на рускиот народ“, што покажува дека неговите амбиции и натаму се длабоко вкоренети.
Еден висок европски функционер се согласува дека Русија во моментов е подготвена привремено да ги ублажи своите цели и да ги подобри односите со САД. Но, тој јасно предупредува дека Кремљ не се откажал од своите максималистички намери. Смета дека Москва сака преку воена сила, економски притисок, медиумска пропаганда и политичко влијание да продолжи со остварување на своите цели – не само во Украина, туку и пошироко.
Во меѓувреме, американските разузнавачки служби веќе го предупредиле тимот на Трамп дека Украина и понатаму останува врвен приоритет за Путин – веднаш по зачувувањето на неговата власт. Тие исто така веруваат дека Путин ќе се обиде да искористи каков било сигнал дека Вашингтон брза со мировен договор.
Конгресменот Џејсон Кроу, член на Комитетот за разузнавање на Претставничкиот дом, изјави: „Путин верува дека од другата страна има претседател кој не знае што прави и кој е фокусиран на брзи победи. Тој мисли дека може да се договори за нешто што потоа едноставно нема да го испочитува.“
