Токму во текот на ноќта, Русија лансирала речиси 150 дронови на повеќе подрачја во Украина, информираа денеска украинските власти. Во најновиот напад, Русија користела вкупно 149 дронови, при што украинските воздушни сили успеале да пресретнат 57 и електронски да блокираат 67.
Како што соопштија локалните власти, едно лице загинало, а 14-годишна девојка е повредена во Павлоград, во областа Дњепропетровск, која е цел на напади трета последователна ноќ. Исто така, едно лице е повредено во напад на Одеса, додека друго во Житомир, јавуваат локалните медиуми.
Министерството за одбрана на Русија денеска соопшти дека руската воздушна одбрана соборила пет украински дронови во пограничниот регион Брјанск, како и три над Кримскиот полуострв, кој Русија го анектираше во 2014. години. Дополнително, пет лица биле повредени во гранатирање на градот Хорливка во делумно окупираната област Донбас, кој, според градоначалникот поставен од Русија, Иван Приходко, бил извршен од страна на украинските сили.
Новиот напад на Русија следуваше неколку часа откако Москва изјави дека ги повратила сите делови на својата погранична област Курск, кои беа заземени од украинските сили во изненаден напад во август минатата година. Сепак, украинските власти тврдат дека борбите во оваа област продолжуваат.
Претседателот на САД, Доналд Трамп, изрази сомнеж дали рускиот претседател Владимир Путин сака да ја заврши војната во Украина која трае повеќе од три години, нагласувајќи дека е малку веројатно дека наскоро ќе се постигне мировен договор. Само ден пред тоа, Трамп рече дека Украина и Русија „се многу блиску до договор“.
„Не постоеше причина Путин да продолжи со испалување ракети во цивилни области и градови во последните неколку дена“, напиша Трамп на социјалните мрежи, додека се враќаше во САД од Рим, каде што присуствуваше на погребот на папата Франциск и се сретна со украинскиот претседател Владимир Зеленски.
Трамп исто така најави дека би можел да воведе нови санкции против Русија.
Ова беше нивната прва директна средба од време на жестоката расправа која се случи во Белата куќа на крајот на февруари.
