Иако папските погреби традиционално се познати по својата сложеност и симболика, папата Франциск уште за време на својот живот ги одобри плановите за значително поедноставување на сопствениот погреб. Со тоа, повторно ја покажа својата скромност и одбивност кон формалниот луксуз, пренесе Би-Би-Си.
За разлика од вековната традиција која предвидува три ковчези – еден од чемпрес, друг од олово и трет од даб – Франциск избра да биде положен во едноставен дрвен ковчег, обложен со слој цинк. Дополнително, тој ја укина и практиката телото на починатиот папа да биде изложено на висока платформа (катафалк) во базиликата Свети Петар за јавна почит.
Наместо тоа, верниците ќе имаат можност да му оддадат почит додека неговото тело се наоѓа во отворен ковчег, во поскромен и подостапен амбиент.
Франциск ќе биде и првиот папа по повеќе од еден век кој нема да биде погребан во Ватикан. Неговите посмртни останки ќе бидат положени во базиликата Санта Марија Маџоре – една од четирите главни папски базилики во Рим. Оваа црква била особено значајна за Франциск, кој често се молел таму по важни настани од неговиот понтификат.
Ватикан денеска, преку видео-соопштение, објави дека папата Франциск почина на 88-годишна возраст. Тој беше првиот Латиноамериканец што застана на чело на Римокатоличката црква и остана запаметен како глас на реформа, скромност и близина со обичниот човек.
