Бугарскиот вицепремиер и министер за одбрана, Красимир Каракачанов во изјава за бугарските медиуми денеска ја најави средбата со пратеникот на македонската Влада, Владо Бучковски и истовремено изнесе серија обвинувања за Македонија, порачувајќи да не се надева на компромис од бугарска страна, пренесува МКД.мк
„Бугарија има јасна позиција и крајно време е Скопје да ги чита одлуките на бугарскиот Парламент. Бучковски е добронамерен човек со политичко искуство, и не случајно е избран за таков преговарач, посредник, но мислам дека властите во Скопје го користат. Едноставно го користат за да се демонстрира добра волја. Тој има добра волја, но јас мислам дека кај тие што го испраќаат нема добра волја. Зашто за 3,5 години не направија ништо и сега се надеваат на компромис од бугарска страна. А тоа нема да се случи.
Сѐ додека отвориш учебник по историја во Северна Македонија и во него пишува дека ние Бугарите сме окупатори, фашисти, татари, разговор не може да има. Така мислам јас“, изјави Каракачанов.
Според него, аргументот „чекајте, ние имаме право да си го определиме идентитетот е апсолутно несериозен аргумент“, зашто никој не ти дава такво право.
„Имаш право да го заштитуваш својот идентитет таков каков што е од тогаш од кога е појавен, а не крадејќи туѓа историја да си создаваш лажен идентитет и да велиш „не е европски да се противите да имаме свој идентитет“. Вие си имате идентитет создаден од Јосип Броз Тито и од Коминтерната, заштитувајте си го и никој не ви посега по него, но Цар Самоил е бугарски цар и не војувал против Бугарија како што пишува во вашите учебници.
Ние Бугарите не сме фашисти, окупатори и старо монголско племе. Уште зборуваме без преведувач. Зборуваме на еден ист јазик ист. Така што додека таму има јазик на омраза, додека некој смета дека ќе се користат странски фактори да ја притискаат Бугарија или ситуацијата во Бугарија ќе се промени со евентуална смена на владата нема смисла да разговараме, мислам дека е губење на време“, порачува Каракачанов.
Тој пред новинарите потсети и дека португалскиот министер за надворешни работи кажал дека проблемите не се меѓу Бугарија и Македонија, туку меѓу ЕУ и Северна Македонија и појасни дека проблемите на една членка се проблеми на целата ЕУ, порачувајќи дополнително дека „манипулациите во Скопје се проблеми за целата ЕУ, а не само за Бугарија“.
„Нивната тактика е многу проста, демонстрираат и имитираат активност, испраќајќи го Бучковски, давајќи изјави дека се спремни за преговори, а во исто време луѓето кои имаат бугарска свест во Македонија се подложени на притисок, вклучително луѓето кои имаат бугарско државјанство и возат автомобили со бугарски таблички. Ги запираат, им прават контроли, им пишуваат глоби, некои луѓе се преместуваат на полоша работа… се прават списоци на луѓе кои се изјаснуваат како Бугари, а еден државен службеник дури рече тие да се екстрадираат во Бугарија. Таму има див менталитет од 19 век и не гледам основа да се очекува напредок“, обвинува тој.
