Драстични промени за Temu и Shein – цените растат поради новите американски тарифи
Популарните кинески онлајн платформи Temu и Shein, познати по своите ниски цени и голем асортиман, најавија поскапување на производите почнувајќи од 25 април. Причината за овој потег лежи во заострувањето на трговските политики на американскиот претседател Доналд Трамп и зголемените царински давачки што сериозно ги зголемија оперативните трошоци на компаниите.
Во дописите што ги испратија до своите корисници оваа недела, и двете компании ги повикаа потрошувачите да ги искористат „денешните цени“ додека сè уште важат.
„Поради неодамнешните измени во глобалната трговија и воведувањето нови царини, нашите трошоци за работа значително пораснаа. За да продолжиме да ви нудиме производи што ги сакате, без компромис во квалитетот, од 25 април 2025 ќе направиме корекција на цените“, се наведува во заедничкото соопштение.
Бизнис моделот под сериозен притисок
Shein и Temu во последниве години забележаа експлозивен раст на американскиот пазар, главно благодарение на законот за изземање, кое овозможуваше производи поевтини од 800 долари да влегуваат во САД без царински давачки.
Но, новата извршна наредба на претседателот Трамп, која стапува во сила на 2 мај, ги укинува овие поволности. Со затворањето на оваа трговска „дупка“, Temu и Shein се соочуваат со фундаментална закана за нивниот бизнис модел, кој во голема мера се потпираше токму на избегнување на високи увозни трошоци.
