Македонската група „Маестро“ на својот концерт синоќа во бугарскиот град Гоце Делчев успеа да направи таква атмосфера што во еден момент на сцената се појави и градоначалникот Владимир Москов и ја испеаја неговата омилена песна „Болен ми лежи млад Стојан“ заедно со Кирил Митоски.
„Концертот беше неверојатен“, „Тоа беше единствено доживување, уживавме со исклучителните музичари“, „Благодариме за овој прекрасен велигденски подарок, кој ни ги стопли душите и срцата“, се дел од коментарите што ги цитира „Струма“, весник од југозападна Бугарија.
„Концертот заврши со вистинска демонстрација на виртуозноста на петтемина музичари, кои исполнија различни популарни песни во нивен аранжман. Преполната сала на Домот на културата се заблагодари со бурни аплаузи за прекрасното доживување“, се додава во написот.
Првиот човек на некогашен Неврокоп, град во Пиринска Македонија со 20 илјади жители, со години кани македонски изведувачи како чекори кон зближување на луѓето од двете страни на границата, па во декември 2023 година во Гоце Делчев одржа божикно-новогодишен концерт ансамблот за народни игри и песни на Македонија, „Танец“.
