Германија ќе ја опреми својата армија, Бундесвер, со “дронови камикази”, вид на оружје кое игра клучна улога во руската војна во Украина, изјави денеска портпаролот на Министерството за одбрана, Митко Милер.
“Потпишани се два договора” за испорака на овие беспилотни летала наполнети со експлозив што се самоуништуваат при погодување на целта, изјави Милер на редовната прес-конференција, не сакајќи да ги именува добавувачите.
Според извештаите на германските медиуми, станува збор за две компании специјализирани за одбранбена вештачка интелигенција, Хелсинг и Старк, кои ги основале германски претприемачи и кои се меѓу најпознатите во оваа област.
Германската армија, која во моментов преминува на принудна модернизација, сè уште го нема ова оружје, кое воени експерти го опишуваат како “лутачка муниција”.
Нарачките се однесуваат на “количини кои овозможуваат да се тестираат во пракса”, за да се стекне искуство во нивната употреба, пред да бидат конечно интегрирани во арсеналот на Бундесверот, изјави портпаролот на министерството.
“Јасно е дека човекот носи одлука дали ќе користи оружје или не”, изјави тој на прашањето за автономијата што им е оставена на овие високотехнолошки машини.
Министерот за одбрана, Борис Писториус, најави крајот на ноември испорака на 4.000 дронови од компанијата Хелсинг за Украина.
Софистицираните летала можат да дејствуваат во домет од 30 до 40 километри на руската територија со цел “напад на борбени точки и логистички чворови”, изјави тој.
Во длабоко пацифистичка Германија, по ужасот на нацизмот, употребата на вооружени дронови и автоматизирани системи за напад долго време беше контроверзна.
Дури по руската инвазија на Украина во февруари 2022 година дошло до пресврт.
Бундесвер има неколку типови на беспилотни летала, вклучувајќи го и “Херон” произведен во Израел, кои се користат за извидување и заштита на сили, наведено е на веб-сајтот на германската армија.
