Британскиот министер за бизнис и трговија, Џонатан Рејнолдс, изјави дека САД се „најблискиот сојузник“ на Велика Британија, но дека британската влада е подготвена за „сите опции“ како одговор на новите царини што ги воведе американскиот претседател Доналд Трамп.
„Ние секогаш ќе дејствуваме во најдобар интерес на британските компании и потрошувачи. Затоа во последните неколку недели целосно сме се фокусирале на преговорите за економски договор со САД, кој ќе го зајакне нашиот постојан фер и балансиран трговски однос“, изјави Рејнолдс во соопштение по едносчасовниот говор на претседателот на САД, Доналд Трамп, во средата, кој се однесуваше на новите царини, пренесува Скај њуз.
Тој нагласи дека британската влада останува посветена на постигнување договор кој ќе ги ублажи последиците од новите царини. Меѓутоа, додаде дека „ништо не е исклучено“ и дека владата ќе направи сè што е потребно за да ги заштити националните интереси.
Според вчера објавената листа на нови американски царини, Трамп одлучи да воведе царинска тарифа од 10% на производите што САД ги увезуваат од Велика Британија, што предизвика загриженост меѓу политичките лидери во Велика Британија, пишуваат медиумите.
Лидерот на либерално-демократската партија, Ед Дејви, го нарече потегот на Трамп „деструктивна трговска војна“ и повика на британската влада да му се спротивстави на „Трамповите обиди за разделување и владеење“.
Тој предложи Лондон да формира коалиција со земјите од Комонвелтот и Европа за заеднички одговор на американските тарифи, вклучувајќи и можни контрамерки.
Според процените на британската компанија „Capital Economics“, царините од 10% би можеле да го намалат британскиот БДП меѓу 0,01 и 0,06%. Исто така, САД воведоа и царина од 25% на увозот на автомобили од целиот свет, што би можело да има дополнителни економски последици за британскиот автомобилски сектор, наведуваат стручњаците.
