Претседателката на Европската комисија, Урсула фон дер Лајен, остро ги критикуваше новите царини воведени од Соединетите Држави за глобалната трговија, предупредувајќи дека тие ќе имаат „катастрофални последици“ за економијата и милиони луѓе ширум светот.
„Да бидеме јасни за огромните последици: глобалната економија ќе претрпи огромен удар, неизвесноста ќе расте, а протекционистичките мерки дополнително ќе се прошират. Последиците ќе бидат страшни за милиони луѓе ширум светот“, рече Фон дер Лајен, откако американскиот претседател Доналд Трамп во средата воведе одмазднички тарифи од 20 отсто за стоките од ЕУ увезени во САД“, пренесува Би-би-си.
Таа посочи дека спроведувањето на тарифите директно ќе влијае на потрошувачите и бизнисите, кои на крајот ќе сносат дополнителни трошоци.
„Ова веднаш ќе се почувствува, особено кај најзагрозените граѓани. Сите бизниси, без разлика дали се мали или големи, ќе ги трпат последиците уште од првиот ден“, нагласи таа.
Фон дер Лајен, исто така, изрази загриженост за широкиот опсег на тарифите, кои сериозно ќе ги поткопаат трговските односи со, како што рече, „најстариот сојузник на Европа“.
„Трошоците за водење бизнис со Соединетите Држави драстично ќе се зголемат. Уште полошо, нема јасна насока во овој хаос, сите главни трговски партнери се погодени без посебен редослед“, посочи таа.
Европската Унија, како што најави, веќе подготвува контрамерки.
„Европа е во завршна фаза на првиот пакет мерки како одговор на првите царини за челик, а ние подготвуваме дополнителни мерки доколку преговорите не дадат резултати“, изјави Фон дер Лајен.
Претседателот на Европската комисија го истакна европското единство и одлучност.
-Европа е во ова заедно. Ако нападнете еден од нас, ќе нè напаѓате сите нас. Нашето единство е нашата сила – рече таа, додавајќи дека ЕУ ќе застане со сите оние кои се директно погодени од новите царини и ќе продолжи да се залага за фер меѓународна трговија заснована на правила.
