Српскиот претседател, Александар Вучиќ, изјави дека власта ја разбрала пораката од денешниот протест, нагласувајќи дека ќе мора да се направат промени.
„Што се однесува до политиката, ние сме во добра позиција, без разлика на тоа колку чинеше сето ова или колку пари беа вложени. Добро ја разбираме пораката и сите во власта мора да ја разберат кога ќе имаат толку многу луѓе кои ќе се соберат. Ќе мораме да се промениме и да научиме многу од ова. Од друга страна, се надевам дека и другите разбираат дека мнозинството во Србија не сака обоена револуција“, изјави Вучиќ на прес-конференцијата во Палатата Србија, во Нов Белград.
Тој ги повика студентите да ги анализираат првите три барања „добро и искрено, без притисок од лажни експертски групи и професори со политички амбиции“, додавајќи дека жали што го исполнил третото барање.
„Ова трае веќе четири и пол месеци. Граѓаните можат да видат дека оние кои го организираат протестот, особено опозицијата, не се грижат за трагедијата. Ако не го откривме оружјето кај Абердарева и плановите на новосадската група, не знаеме како ќе завршеше ова. Не сме сигурни дека откривме сè. Се сомневаме дека постои скриен стан каде членови на криминални групи криеле оружје“, истакна Вучиќ.
„Благодарност и на големиот дел од Србија, на милионите луѓе кои со загриженост го следеа ова, кои покажаа трпение и толеранција и покажаа дека знаат како да ги слушаат барањата на другата страна. Ние не користевме цистерни или водени топови, а вие го слушавте сето тоа. Се обидуваме да покажеме дека сме подемократски од оние кои ни зборуваат за тоа“, додаде Вучиќ.
