СВ. ПРОРОК АВАКУМ: Пророкуваше 600 години пред Христа и му прорече пустош на Ерусалим

Денеска е 2 декември (по стар стил) и се слави Св. пророк Авакум.

Син Асафатов, од племето Симеоново. Пророкуваше 600 години пред Христа, за време на царот Манасија. Му прорече опустошување на Ерусалим.

Кога вавилонскиот цар Навуходоносор го нападна Ерусалим, Авакум се засолни во Исмаилската земја, од каде што потоа повторно се врати и живееше како земјоделец. Еден ден им носеше ручек на работниците на нива, кога одеднаш му се јави Ангел Господов и му рече: „Однеси го ручекот што го имаш во Вавилон кај Даниил во јамата лавовска.“ А Авакум му рече: „Господи, Вавилон не сум го видел и јамата не знам каде е“ (Даниил 14 – 33).

Тогаш Ангелот го зеде за косата и моментално го пренесе во Вавилон, на огромна далечина, кај лавовската јама во којашто беше фрлен Даниил од царот Кир, за казна дека не им се поклони на идолите. „Данииле, Данииле, прими го ручекот што ти го праќа Бог!“, возвикна Авакум. И Даниил прими и јадеше.

Потоа Ангелот Божји повторно го зеде Авакум и го пренесе во Јудеја, на неговата нива. Авакум пророкуваше за ослободувањето на Јерусалим и за времето Христово. Се упокои во длабока старост, а закопан е во местото Кела. Моштите му ги открија во времето на царот Теодосиј Велики.

СВ. МАЧЕНИЧКА МИРОПИЈА: Господ не ја остави Својата маченичка без утеха



Денеска е 2 декември (по стар стил) се слави и Св. маченичка Миропија.

Родена е во Ефес од родители христијани. По смртта на татко ѝ, со мајка ѝ се пресели на островот Хиос, каде што пострада за Христа. Страдањето на оваа света девица стана недолго после страдањето и смртта на славниот маченик Исидор војник (под 14 мај). Кога мачителите го убија Исидор, храбрата Миропија тајно го зеде неговото тело, го покади и чесно го погреба на едно посебно место.

Свирепиот кнез Нумеријан слушна дека телото на маченикот е украдено, па сакаше да ги погуби стражарите. Кога дозна дека невини луѓе ќе страдаат заради нејзиното дело, блажената Миропија се пријави сама пред власта и призна дека таа го украла и го погребала телото на маченикот.

По наредба на кнезот ја биеја по целото тело и најпосле сета во рани ја фрлија во затвор. Но, Господ не ја остави Својата маченичка без утеха. На полноќ, затворот го осветли небесна светлина и ѝ се јави мнозинство ангели со светиот Исидор среде нив. „Мир на тебе, Миропијо,“ ѝ рече свети Исидор, „дојде молитвата твоја пред Бога и наскоро ќе бидеш со нас и ќе го примиш венецот што е за тебе подготвен“. Светата страдалница се израдува и во тој миг Му го предаде својот дух на Бога.

Од нејзиното тело излезе благоухан мирис, којшто го исполни сиот затвор. Еден од стражарите го виде и го почувствува сево ова, поверува во Христа, се крсти и наскоро и самиот прими маченичка смрт. Света Миропија се пресели во вечноста во 251 година.