Барселона ќе му го продолжи договорот на Рафиња, а со тоа ќе го направи еден од најплатените играчи

Рафиња е еден од клучните играчи на Барселона во оваа сезона, и бразилецот игра во животна форма под водство на тренерот Ханси Флик. Неговите одлични изведби на теренот го направија незаменлив дел од тимот, а раководството на каталонскиот клуб има намера да го награди за неговите претстави. Планот е да му се продолжи договорот и да стане еден од најплатените играчи во клубот.

Рафиња моментално има договор со Барселона до јуни 2027 година, но клубот сега сака да го прошири тој договор до 2030 година, со цел да ја задржи својата ѕвезда на подолг рок. Оваа стратегија доаѓа како резултат на неговите извонредни настапи и значајната улога што ја игра во тимот.

Дополнително, важно е да се напомене дека пред некое време клубови од Саудиска Арабија нудеа 100 милиони евра како отштета за Рафиња и 15 милиони евра годишно за него. Сепак, и покрај привлечните понуди, овој трансфер не се реализираше, што дополнително ја потврдува важноста на Рафиња за Барселона.