Секогаш кога зборуваме за други нешта зборуваме и за нашиот основен проблем, дека редно време е да се однесуваме така како двата блиски народа, бугарскиот и македонскиот, како граѓаните, со разбирање и взаемна почит за да можеме да најдеме некое заедничко решение, порача денеска претседателката Гордана Сиљановска – Давкова во Велес на националанта конференција „Заедно сме посилни“, во организација на Здружението на лица со церебрална парализа и други попречености.
Во одговор на новинарско прашање поврзано со телефонскиот разговор со бугарскиот претседател Румен Радев, претседателката рече дека посакува да се изнајде решение за проблемот, бидејќи, како што рече, судбина ни била не случајно да живееме едни до други, па дури и да се разбираме.
-Судбина ни била не случајно да живееме едни до други па дури и да се разбираме и мислам дека тоа нè обврзува. Двајцата таа траекторија ја тераме, полека мирно со разбирање и почит. Јас посакувам да најдеме решение, рече Сиљановска Давкова.
Прашана дали ќе има билатерална средба, Давкова рече дека сигурно ќе има, но дека не може од сега со сигурност да каже.
– Сигурно ќе има, но не можам однапред да кажам тоа е на 4 април. Средбата е мултилатерална и има секогаш дебата за процесот, до каде сме и какви се заканите со растечкиот радикализам, екстремизам и тероризам. Сите знаеме дека заканите постојат овде и дека кога се во прашање со растечкиот радикализам, екстремизам и тероризам, исто така треба сите да се обединиме и да се справуваме со нив, бидејќи безбедноста, стабилноста и мирот зависи од регионалниот мир и безбедност, рече претседателката.
