Во срцето на Старата Чаршија денес беше промовиран значаен урбан проект – Поврзувачката Порта меѓу Бит Пазар и Старата Чаршија. Градоначалникот на Чаир, Висар Ганиу, истакна дека оваа конструкција, изработена од челик и стакло, не е само влез во еден од најисториските делови на Скопје, туку и симбол на културната и трговската поврзаност на оваа зона.
„Оваа Порта не е само архитектонски елемент, туку мост меѓу минатото и сегашноста, создавајќи хармоничен дијалог меѓу традицијата и модерното. Низ неа, Старата Чаршија останува верна на својот дух, но добива и нова димензија на функционалност и атрактивност,“ изјави Ганиу.
Со својата лесна и транспарентна структура, новата Порта не само што обезбедува заштита од атмосферските влијанија, туку и го зајакнува урбаниот карактер на просторот, подобрувајќи го искуството на граѓаните и туристите.
Градоначалникот Ганиу нагласи дека општина Чаир ќе продолжи со проекти кои го унапредуваат јавниот простор и создаваат поквалитетна урбана средина. „Со визија и посветеност, заедно ќе работиме за Чаир кој ги спојува традицијата, културата и современите потреби на граѓаните,“ додаде тој.
