Денеска е Св. Варлам и св. пророк Авдиј

Според календарот на МПЦ (Јулијанскиот календар) денеска е 19 ноември. Денеска е Св. маченик Варлам и св. пророк Авдиј.

Свети Варлам беше Антиохиец. Заради верата во Христос како Бог, беше изведен пред суд и ма чен. Најпосле, мачителите на дланката му истурија жар, а одозгора ставија темјан, сакајќи да го натераат да го фрли жарот со темјанот пред идолите, па така да го натераат да ги окади. Но, Варлам долго го држеше жарот во дланката, додека дланката сосема не му изгоре. Потоа, свети Варлам издивна од големата болка и го прададе својот дух на Бога. Пострада во 304 година.



Денес Црквата го слави и свети пророк Авдиј, кој живееше 900 години пред Христос.

Родум од селото Витахарамско од пределите Сихемски. Живеел на дворецот на царот Ахав; но кога царот отстапи од вистинското богопочитување и им се поклони на идолите, Авдија не тргна по примерот на царот, туку продолжи да му служи на единствениот вистински Бог. А кога злобната царица Језавела заради пророкот Илија крена хајка на сите Божји пророци, Авдија собра стотина од нив, ги скри во две пештери и ги хранеше до крајот (1 Царства 18, 4). Современик на големиот пророк Илија, Авдија многу го почитуваше Илија и го слушаше во сѐ како негов следбеник и ученик. Живееше 900 години пред Христа и се упокои мирно.



ОД КАТОЛИЧКИОТ КАЛЕНДАР: Денеска е Благословен Иван Рајсбрек.

Бил роден во 1293 година, во Фландрија, во местото Рајсбрек кај Брисел. Господ го надарил со големи способности и со желба за знаење. Ја сакал филозофијата и теологијата. Станал свештеник, а потоа и поглавар на својата заедница. Како поглавар, бил пример на понизност на покорност, извршувајќи ги во манастирот и “најниските” работи. Луѓето доаѓале кај него на духовни разговори и за совети. Рајсбрек се вбројува меѓу поетите мистици. Не се плашел од заминувањето од овој свет, туку со радост и копнеж, и одел во пресрет.