„Прашањето е решено, конечно и неповратно“: грчкото МНР ја оценува како провокација изјавата на Мицкоски
Мицкоски, соопшти МНР на Грција, „се обидува да го врати во преден план едно од прашањата што веќе е решено, како што знаеме, конечно и неповратно“.
Тоа, како што пишуваат грчките медиуми е одговор на коментарите на Мицкоски на собирот на северномакедонци во Њу Џерси во средата, за време на неговата посета на САД за инаугурацијата на претседателот Доналд Трамп.
„Треба да почнеме да победуваме во Вашингтон, Брисел, Берлин, Лондон, Париз, Рим ако сакаме конечно македонското прашање да дојде до својата завршница. Нашето прашање не е решено. Тоа тлее со векови и сè уште постои“, рече премиерот на Северна Македонија, цитиран од весникот „Република“, стои во написите на медиумите во Грција.
„Овој настан претставува провокација за Грција, обидувајќи се да го врати на преден план прашањето што е решено, како што знаеме, конечно и повторно“, велат од Миинистерството за надворешни работи на Грција според тамошните медиуми.
„Грција потсетува дека натамошниот напредок на билатералните односи со Северна Македонија и непреченото продолжување на европскиот курс на соседната земја бараат целосно почитување на Договорот од Преспа и, се разбира, воздржување од иредентистички прокламации и претензии кон соседните земји“, е подвлечено од грчкото министерството.
Изјавата се однесува на историскиот договор потпишан меѓу Атина и Скопје во 2018 година за решавање на деценискиот спор за името.
Грчките медиуми анализираат дека „откако ја презеде функцијата минатото лето, Мицкоски, националист, често ги прекрши условите од договорот нарекувајќи ја неговата земја „Македонија“ наместо да го користи уставното име Северна Македонија“.
