Градоначалникот на Општина Битола, Тони Коњановски, денес го посети Средното општинско земјоделско училиште „Кузман Шапкарев“, каде заедно со директорот Златко Крстевски, ги претставија најновите инвестиции во подобрување на условите за образование.
Во рамките на проектите реализирани во соработка со локалната самоуправа и Министерството за образование, целосно се реновирани четири работни простории и два кабинети, вредни 1.600.000 денари. Реновирањето опфати нови подови, ѕидови, тавани, како и замена на електричната инсталација.
Покрај тоа, набавени се нагледни средства во износ од 250.000 денари за практичната настава на учениците од агрономските насоки, компјутерска опрема од 70.000 денари и нов училишен инвентар вреден 65.000 денари.
„Ова е само дел од нашата посветеност кон подобрување на условите во училиштата. Работиме на нови проекти, вклучително и реконструкција на спортски сали и игралишта, со цел да им овозможиме на учениците и наставниците средина во која ќе можат да постигнуваат уште поголеми успеси,“ истакна Коњановски.
Директорот Крстевски се заблагодари за соработката со општината, која е клучен партнер во поддршката на квалитетното образование и професионалниот развој на учениците.
