Градоначалникот на Општина Битола, Тони Коњановски, денес одржа работна средба со претставниците на зимската служба, фокусирајќи се на координацијата на активностите пред најавените снежни врнежи.
На состанокот присуствуваа претставници од општинските јавни претпријатија, Македонија пат, ЈП „Стрежево“, Министерството за внатрешни работи, Центарот за управување со кризи и Дирекцијата за заштита и спасување. Коњановски ја истакна важноста од навремено и ефикасно организирање на службите за да се овозможи непречено функционирање на сообраќајот.
„Целта ни е да обезбедиме максимална проодност на патиштата во градот, населените места и регионалните правци, особено кон туристичките и скијачките центри како Копанки и Стрежево, како и патот кон граничниот премин Меџитлија,“ изјави Коњановски.
На средбата беа донесени значајни заклучоци за поинтензивна координација меѓу службите, што ќе овозможи брзо и ефикасно расчистување на снегот и овозможување безбеден сообраќај за граѓаните.
Градоначалникот нагласи дека Општина Битола е подготвена за зимската сезона, а зимската служба ќе биде во постојана готовност за да одговори на сите предизвици што ги носи зимата.
