Министерството за животна средина и просторно планирање (МЖСПП) информира дека е надминат прагот на алармирање за присуство на суспендирани честички со големина до 10 микрометри (PM10) во Струмица. Според податоците од Државниот автоматски мониторинг систем за квалитет на амбиенталниот воздух, како и временската прогноза добиена од Управата за хидрометеоролошки работи, загадувањето е алармантно.
„Прагот на алармирање е дефиниран во Уредбата за изменување и дополнување на Уредбата за гранични вредности за нивоа и видови на загадувачки супстанции во амбиенталниот воздух. Тоа значи надминување на вредноста од 150 mg/m³ во текот на два последователни дена, што е евидентирано на 6-ти и 7 јануари,“ истакнуваат од Министерството.
Со цел да се справи со настанатата состојба, Министерството побара да се преземат итни мерки, меѓу кои: интензивирање на инспекциски надзори кај инсталации со А-Интегрирани еколошки дозволи и на инсталации со Б-Интегрирани еколошки дозволи и елаборати, континуиран мониторинг од страна на инсталациите со обврска за јавен пристап до податоците, контроли на возила, особено оние со дизел мотори и нерегистрирани возила, контроли на градилиштата и строга забрана за горење на отворено.
Дополнително, Министерството препорачува: ослободување од работа за бремени жени, лица постари од 60 години, како и за лица со хронични заболувања (астма, прележан инфаркт или мозочен удар), по препорака на матичен лекар, реорганизација на работното време за вработените на отворено, кои треба да работат во периодот од 11:00 до 17:00 часот, избегнување на активности на отворено, како спортски натпревари и културни манифестации.
„Оваа состојба бара одговорност и солидарност од сите. Ги повикуваме граѓаните да избегнуваат горење отпад, да ја ограничат употребата на возила и да користат еколошки алтернативи за затоплување,“ велат од Министерството.
И покрај преземените мерки, концентрациите на загадувачки честички остануваат високи, што ја става Струмица на листата на најзагадени градови во земјата. Од Министерството најавуваат дека ќе продолжат со интензивен мониторинг и дополнителни мерки доколку состојбата не се подобри.
МЖСПП ги повикува сите институции и граѓани за заедничко делување во борбата против загадувањето на воздухот и заштита на здравјето на граѓаните.
