Минатиот месец Хрватска испрати нон-пејпер до Црна Гора, во кој бара решавање на неколку отворени прашања кои ги нарушуваат меѓусебните односи меѓу двете земји.
Меѓувладината конференција за пристапување, на која Црна Гора ќе затвори три поглавја од преговорите за членство во ЕУ – право за интелектуална сопственост, информатичко општество и медиуми и претприемништво и индустриска политика, ќе се одржи во понеделник на 16 декември.
Црна Гора беше технички подготвена да затвори четири поглавја, но Хрватска денеска беше против затворање на поглавјето за надворешна, безбедносна и одбранбена политика.
Минатиот месец Хрватска испрати нон-пејпер до Црна Гора, во кој бара решавање на неколку отворени прашања кои ги нарушуваат меѓусебните односи меѓу двете земји.
Во тој документ, според дипломатски извори, се наведува дека двете земји треба да ги решат прашањата за сопственоста на тренинг-бродот Јадран, меѓусебната демаркација, гонењето на воените злосторства, потрагата по исчезнати лица, како и прашањето за називот на градскиот базен во Котор, кој го носи името на поранешниот ватерполист Зоран Гопчевиќ, за кого Хрватска тврди дека бил чувар во логорот Морињ.
По позитивниот Извештај за исполнување на привремените одредници, Црна Гора во јуни годинава излезе од повеќегодишниот застој и го деблокираше пристапниот процес, но потоа се влошија односите со соседна Хрватска, која е членка на ЕУ. Освен отворените прашања со Загреб од претходно, ситуацијата се влоши откако Собранието на Црна Гора на крајот на јуни ја усвои Резолуцијата за геноцидот во Јасеновац. Загреб ова го оцени како провокација и прогласи тројца високи црногорски функционери за непожелни лица во Хрватска.
Новата методологија на пристапните преговори, усвоена на почетокот на 2020 година, предвидува наместо поединечни поглавја, да се отворат неколку кои се поврзани во шест кластери, односно шест тематски целини, а кога се затвораат поглавјата, тоа се прави поединечно.
Унгарското претседателство силно се залага да се отвори кластерот 3 со Србија, за што, според Комисијата, земјата е технички подготвена, но сè уште нема консензус меѓу земјите-членки.
Србија денеска не беше на дневен ред на состанокот на Комитетот на постојани претставници, бидејќи 8 земји сè уште се против отворањето на тој кластер. Тоа се Бугарија, Хрватска, Финска, Шведска, Естонија, Холандија, Летонија и Литванија.
Амбасадорите постигнаа договор и за отворање кластер 6 со Албанија, во вторник на 17 декември.
