Министерката за образование и наука, Весна Јаневска, денеска ја посети Општина Битола, каде оствари средба со градоначалникот Тони Коњановски. Главна тема на разговорот беше прогласувањето на СОТУ „Ѓорѓи Наумов“ за регионален центар за стручно образование во регионот Пелагонија, како и за унапредување на образовните процеси во општината.
Јаневска изрази задоволство што токму ова училиште е избрано за регионален центар, нагласувајќи дека по завршените анализи ќе се дефинираат потребните струки и профили, а истовремено ќе се пристапи кон инфраструктурно средување и модерно опремување на училиштето.
„Овој процес бара време, но СОТУ ‘Ѓорѓи Наумов’ ќе стане еден од осумте регионални центри што треба да се заокружат до 2027 година. Центрите во Охрид и Куманово веќе функционираат, а оној во Тетово е во фаза на изградба. И Битола ќе добие модерен образовен центар кој ќе биде од огромна корист за целиот регион,“ истакна министерката, додавајќи дека со ваквите центри учениците ќе стекнат високи компетенции и ќе бидат подготвени за вработување во локалниот пазар.
Градоначалникот Коњановски ја истакна важноста на оваа иницијатива, нагласувајќи дека со прогласувањето на СОТУ „Ѓорѓи Наумов“ за регионален центар, се прави голем чекор кон задржување на младите во регионот преку квалитетно образование и создавање на стручни кадри кои ќе одговараат на потребите на локалниот бизнис сектор.
„Образованието е приоритет за нас како локална самоуправа. Посветено работиме на подобрување на условите во училиштата, реконструкција на спортски сали и поставување на фотоволтаици. Овој проект е доказ за нашата заложба да направиме повеќе за нашата заедница и за иднината на младите,“ изјави Коњановски, заблагодарувајќи ѝ се на министерката за нејзината поддршка.
Со овој проект, Битола се позиционира како еден од водечките центри за стручно образование, што ќе има позитивен ефект врз локалната економија и квалитетот на живот во регионот.
